(非傻豬事)
喺診所入面，有一對老夫婦永遠都好似孖公仔咁一齊睇醫生，因為聽講婆婆係撞聾的。公公話:佢要我講嘢先聽到㗎！
婆婆好似一個少女咁含情脈脈望住公公笑而不語…
有日，公公冇嚟到診所，婆婆自己一個到診所…
我:今日得你一個嘅？
婆婆:阿公佢入咗院呀！
我:咦，你聽到我講嘢嘅？
婆婆:我有助聽㗎，阿公當我聽唔到，佢又鍾意講嘢，咪由得佢講哂咯，邊個講都一樣啫！
我:哦～公公乜事入院呀？冇事呀嘛？
婆婆:老人病啫，佢少少事都嗌生嗌死㗎！
我:哦～冇事就得啦～
婆婆睇完醫生拎完藥之後，冇走到繼續坐喺度，突然興起就訴說想當年:我同阿公爭十幾年㗎，佢細我好多㗎！阿女你知唔知嗰時嘅年代唔接受我哋㗎！我大佢十幾年喎！我離家出走都要嫁俾佢㗎～大家一走，咁就冇咗阿爸阿媽到而家咯！唉，為啖氣啫！我同阿公又冇兒冇女，得我哋兩個，哎，阿公如果就咁走咗，我都唔知點好咯！跟埋佢一齊走咯！
我唔識點安慰，唯有遞上紙巾:冇事嘅～
佢:人都叉咗腳入棺材咯，我哋呢啲老骨頭話走就走㗎啦～阿公仲話自己後生過我咁多，實係佢燒香俾我食，睇住我走～我仲以為一定係我走先，仲擔心佢一支公冇人陪～老啦老啦，冇鬼用啦，咁大年紀有乜用呀～
我:唔駛咁擔心嘅，公公冇乜事就好快出院㗎啦～
佢重覆咗以上類似說話接近六七次，望一望鐘:阿女，你就夠鐘食飯咯？
我:係呀～
佢:我都要去買燒腩仔俾阿公咯！佢話明明死唔去，食醫院飯都食死啊！
我:唔好食啲咁油膩嘅嘢啦～～
佢:人都咁老咯，鍾意食乜就食啦！
婆婆篤住枴杖慢慢咁離開診所…
大約一星期後，公公同婆婆再孖公仔出場。
我:公公你冇事啦？
公公:冇事啦！可以繼續拖住老婆仔做佢嘅保鏢啦！
婆婆低頭笑住默默點頭，兩個繼續手拖手，做對方嘅枴杖…
一個月…
兩個月…
三個月…
公公嚟到診所，陪伴喺身邊嘅再唔係少女般嘅婆婆，而係一個濃妝艷抹，衣著性感嘅姨姨…
我:公公，今日唔見婆婆嘅？
公公:冇咯，走咗咯，一個肺炎就走咗咯！
我望住眼前春風滿面嘅公公…
婆婆，至少你擔心嘅「冇人陪」冇發生到…喺你生前有一個為你而拋棄一切，待你如小妹妹，陪伴左右充當保鏢嘅伴侶，我相信你哋嘅愛情係美滿的 :)
Search